شیبو سورین کی حالت تشویشناک، صدر جمہوریہ نے کی عیادت، سیاسی رہنماؤں اور عوام کی جانب سے دعائیں

نئی دہلی/رانچی: جھارکھنڈ کے سابق وزیر اعلیٰ، جھارکھنڈ تحریک کے سرکردہ رہنما اور راجیہ سبھا کے رکن شیبو سورین کی حالت دہلی کے سر گنگا رام اسپتال میں تشویشناک بنی ہوئی ہے۔ وہ برین اسٹروک، گردے کی بیماری، شوگر اور دل کی پرانی بیماریوں کا سامنا کر رہے ہیں۔ حالیہ برین اسٹروک کے بعد ان کے جسم کا بایاں حصہ مفلوج ہو گیا ہے اور وہ پچھلے ایک سال سے ڈائلیسس پر ہیں۔

ان کی ناساز طبیعت کی خبر سے جھارکھنڈ سمیت پورے ملک میں فکرمندی کی لہر دوڑ گئی ہے۔ مختلف سیاسی جماعتوں کے رہنماؤں نے ان کی صحتیابی کے لیے نیک تمناؤں کا اظہار کیا ہے۔ جھارکھنڈ مکتی مورچہ، بی جے پی، کانگریس اور دیگر جماعتوں کے قائدین نے ان کے لیے دعائیں کی ہیں۔