سپریم کورٹ نے مرکز و ڈی جی سی اے سے تفصیلی وضاحت طلب کی

یاد رہے کہ 12 جون کو ایئر انڈیا کی فلائٹ 171 احمد آباد کے قریب حادثے کا شکار ہوگئی تھی، جس میں کیپٹن سُميت سبر وال سمیت 270 افراد ہلاک ہو گئے تھے۔ اس حادثے نے نہ صرف ملک کی سول ایوی ایشن سکیورٹی پر سوالات اٹھائے بلکہ تحقیقات کی شفافیت پر بھی بحث چھیڑ دی ہے۔

پائلٹ کے والد پُشکر راج سبر وال نے عدالت میں یہ موقف رکھا کہ ان کے بیٹے کا 30 سالہ کریئر کسی بھی قسم کے حادثے یا شکایت سے پاک تھا، اور وہ ہمیشہ اپنی پیشہ ورانہ مہارت، نظم و ضبط اور ذمہ داری کے لیے جانے جاتے تھے۔ ان کا کہنا تھا کہ اب جبکہ پائلٹ خود اپنا دفاع نہیں کر سکتے، اس لیے ضروری ہے کہ تحقیقات مکمل غیر جانبداری اور شفافیت سے کی جائیں تاکہ ان کے بیٹے کی ساکھ کو نقصان نہ پہنچے۔