سابق مرکزی وزیر داخلہ اور کانگریس کے سینئر رہنما شیو راج پاٹل کا 91 سال کی عمر میں انتقال

شیو راج پاٹل 12 اکتوبر 1935 کو لاتور کے چاکور گاؤں میں پیدا ہوئے۔ ابتدائی تعلیم کے بعد انہوں نے پہلے آیوروید کا مطالعہ کیا اور بعد میں ممبئی یونیورسٹی سے قانون کی ڈگری حاصل کی۔ ان کا سیاسی سفر 1967 میں شروع ہوا جب وہ لاتور میونسپل کونسل کے رکن منتخب ہوئے۔ یہ ابتدائی ذمہ داری آگے چل کر ایک طویل اور اثر انگیز سیاسی کیریئر کی بنیاد بنی۔

پاٹل 1972 اور 1978 میں لاتور اسمبلی سیٹ سے کامیاب ہوئے۔ اس کے بعد 1980 میں پہلی بار لوک سبھا کے لیے منتخب ہوئے اور حیرت انگیز طور پر 1980 سے 1999 تک مسلسل 7 مرتبہ لاتور کی نمائندگی کرتے رہے۔ 2004 میں وہ بی جے پی کی امیدوار روپا تائی پاٹل نیلانگیکر سے شکست کھا گئے، تاہم مرکز میں انہیں اہم ذمہ داری سونپی گئی۔