ریٹھالہ میں واقع کیمیکل فیکٹری میں خوفناک آگ، 12 گھنٹے بعد بھی قابو نہیں، 3 افراد ہلاک

یہ حادثہ ریٹھالہ میٹرو اسٹیشن کے قریب ایک 4 منزلہ عمارت میں پیش آیا، جہاں پولی تھین تیار کی جاتی تھی۔ ابتدائی اطلاعات کے مطابق آگ سب سے پہلے گراؤنڈ فلور پر لگی، جو تیزی سے پوری عمارت میں پھیل گئی۔ آگ لگنے کے فوری بعد علاقے میں بھگدڑ مچ گئی اور مقامی لوگوں نے اپنی مدد آپ کے تحت آگ پر قابو پانے کی کوشش کی، جس کے باعث فائر بریگیڈ کو اطلاع دینے میں تاخیر ہوئی۔

فائر ڈپارٹمنٹ کے افسر اشوک کمار جیسوال کے مطابق، انہیں شام 7 بج کر 25 منٹ پر اطلاع ملی، لیکن بعد میں معلوم ہوا کہ آگ تقریباً ایک گھنٹہ قبل ہی لگ چکی تھی۔ انہوں نے بتایا کہ فیکٹری میں کام کرنے والوں نے خوف کے مارے فوری طور پر مدد نہیں لی اور خود ہی آگ بجھانے کی کوشش کی، جس کی وجہ سے حالات مزید بگڑ گئے۔ جب عمارت کا بڑا حصہ جل کر راکھ ہو چکا تھا، تب فائر بریگیڈ کو فون کیا گیا۔