روس میں 8.8 شدت کا زلزلہ، امریکہ سے جاپان تک سونامی کا الرٹ جاری

زلزلے کے بعد جاپان میں فکوشیما نیوکلیئر پلانٹ کو احتیاطی طور پر خالی کرا لیا گیا ہے۔ یاد رہے کہ 2011 میں 9.0 شدت کے زلزلے اور اس کے بعد سونامی نے فکوشیما میں شدید تباہی مچائی تھی، جہاں ری ایکٹرز کے پگھلنے اور ریڈیائی مواد کے اخراج جیسے مہلک اثرات سامنے آئے تھے۔ اسی خدشے کے پیش نظر اس بار فوری احتیاطی اقدامات کیے گئے ہیں۔

رپورٹس کے مطابق روس، جاپان اور امریکہ کے ساحلی علاقوں میں سونامی کی تین سے بارہ فٹ تک اونچی لہریں اٹھنے کا اندیشہ ہے۔ خاص طور پر امریکی ریاست کیلیفورنیا، ہوائی اور جاپان کے ساحلی علاقوں میں خطرے کا درجہ بلند کر دیا گیا ہے۔ ہوائی میں شدید ٹریفک جام کی اطلاعات ملی ہیں کیونکہ سیاح اور مقامی لوگ محفوظ علاقوں کی طرف نقل مکانی کر رہے ہیں۔