رانچی کی مرکزی جیل میں ڈانس پارٹی پر ہائی کورٹ برہم، دو دن میں مستقل سپرنٹنڈنٹ کی تقرری کا حکم

رانچی: ہوٹوار واقع برسا منڈا سینٹرل جیل میں سنگین مقدمات کے ملزموں کی مبینہ ڈانس پارٹی اور اس کی ویڈیو منظرِ عام پر آنے کے بعد جھارکھنڈ ہائی کورٹ نے سخت ناراضگی ظاہر کی ہے۔ عدالت نے اس معاملے کا از خود نوٹس لیتے ہوئے منگل کو تفصیلی سماعت کی، جس میں جیل آئی جی سشریر حاضر ہوئے۔ عدالت نے اس واقعے کو انتہائی شرمناک اور جیل نظام کی ناکامی قرار دیا۔

چیف جسٹس ترلوک سنگھ چوہان کی سربراہی والی بنچ نے حکومت کو زبانی حکم دیتے ہوئے کہا کہ برسا منڈا سینٹرل جیل میں دو دن کے اندر اندر مستقل (ریگولر) جیل سپرنٹنڈنٹ کی تقرری یقینی بنائی جائے۔ عدالت نے واضح کیا کہ حساس نوعیت کی جیل میں مستقل افسر کی عدم موجودگی انتظامی بدنظمی اور سیکیورٹی رسک کو بڑھاتی ہے، جس کے نتائج اس واقعے کی صورت میں سامنے آئے۔