دہلی میں آلودگی کے پیشِ نظر 50 فیصد ورک فرام ہوم پر سختی، خلاف ورزی پر کارروائی کی وارننگ

کپل مشرا نے کہا کہ دہلی کے تمام محکموں اور اداروں میں 50 فیصد ورک فرام ہوم پہلے ہی نافذ ہے مگر اب اس پر سختی سے عمل کرایا جائے گا۔ انہوں نے خبردار کیا کہ اگر کسی دفتر یا ادارے میں اس ضابطے کی خلاف ورزی پائی گئی تو متعلقہ حکام کے خلاف کارروائی کی جا سکتی ہے۔ وزیر کے مطابق یہ اقدام شہریوں کی صحت کے تحفظ اور آلودگی کے اثرات کم کرنے کے لیے ضروری ہے۔

وزیر نے یہ بھی بتایا کہ کمیشن فار ایئر کوالٹی مینجمنٹ (سی اے کیو ایم) اور محکمۂ ماحولیات کی ہدایات کے مطابق یہ پابندیاں لاگو کی گئی ہیں۔ ان کے مطابق صرف ضروری خدمات جیسے ہیلتھ کیئر، اسپتال، فائر ڈپارٹمنٹ، جیل اور عوامی ٹرانسپورٹ کو مکمل ورک فورس کے ساتھ کام کرنے کی اجازت ہوگی، جبکہ دیگر تمام اداروں پر 50 فیصد حاضری کا اصول لاگو رہے گا۔