دہلی این سی آر میں موسلا دھار بارش؛ سڑکیں دریا میں تبدیل، شمالی ریاستوں میں الرٹ

نوئیڈا اور غازی آباد میں بھی تیز بارش نے عام زندگی کو متاثر کیا ہے، جبکہ گڑگاؤں میں صبح پانچ بجے سے موسلا دھار بارش ہو رہی ہے۔ بارش کی شدت اس قدر زیادہ ہے کہ سائبر سٹی کے متعدد علاقے پانی میں ڈوب گئے ہیں۔ سیکٹر 9 اور سیکٹر 10 سمیت کئی مقامات پر سڑکیں تالاب کا منظر پیش کر رہی ہیں، جس سے آمد و رفت بری طرح متاثر ہوئی ہے۔

محکمہ موسمیات نے صبح 6 بجے کے قریب جاری ایک اپڈیٹ میں کہا کہ آئندہ دو سے تین گھنٹوں کے دوران دہلی اور این سی آر میں زیادہ تر مقامات پر ہلکی سے درمیانی اور کچھ جگہوں پر درمیانی سے بھاری بارش ہونے کا امکان ہے۔ ساتھ ہی شمالی ہند کی دیگر ریاستوں ہریانہ، چنڈی گڑھ، پنجاب، ہماچل پردیش، اتراکھنڈ، شمالی مدھیہ پردیش اور مغربی اتر پردیش میں بھی آئندہ چند گھنٹوں کے دوران درمیانی سے شدید بارش کی پیش گوئی کی گئی ہے۔