سماج وادی پارٹی کے قومی صدر و اترپردیش کے سابق وزیر اعلیٰ اکھلیش یادو اور ان کی رکن پارلیمنٹ اہلیہ ڈمپل یادو اتوار کو خلائی مسافر گروپ کیپٹن شبھانشو شکلا کے گھر پہنچے۔ انہوں نے شبھانشو شکلا کے ایکسیوم-4 خلائی مشن میں تاریخی پرواز کی کامیابی پر اہل خانہ کو مبارک باد دی اور اس قابل فخر لمحہ میں اپنی نیک خواہشات کا اظہار کیا۔ یہ ملاقات شبھانشو شکلا کے آبائی گھر پر ہوئی، جہاں اکھلیش یادو اور ڈمپل یادو نے اہل خانہ کے افراد سے بات چیت بھی کی۔
واضح ہو کہ اکھلیش یادو نے اس سے قبل بھی 26 جون کو پریس کانفرنس کے دوران خلائی مسافر شبھانشو شکلا اور ان کے اہل خانہ کو اس تاریخی کامیابی پر مبارک باد پیش کی تھی۔ انہوں نے کہا تھا کہ ’’میں شبھانشو شکلا جی کو اور ان کے اہل خانہ کو مبارک باد دینا چاہتا ہوں۔ ایسے کم لوگ ہوتے ہیں جنہیں ایسا موقع ملتا ہے۔ ان کا مشن کامیاب ہو، اور ہندوستان کا بھی نام روشن ہو۔‘‘
گروپ کیپٹن شبھانشو شکلا کی بہن نے اکھلیش یادو سے ملاقات کے بعد نیوز ایجنسی ’آئی این ایس‘ سے بات کرتے ہوئے کہا کہ ’’انہوں نے اپنی مبارکباد پیش کی، اور مجھے واقعی بہت اچھا لگا۔ وہ بہت خوشی اور فخر محسوس کر رہے تھے۔ انہوں نے کہا کہ ایک ہندوستانی ہونے کے ناطے ان کے لیے یہ بہت فخریہ لمحہ ہے کہ ہمارے شہر اور ہمارے ملک کا ایک بچہ اتنی بلندیوں پر پر پہنچ رہا ہے۔ وہ واقعی میں بہت خوش تھے۔‘‘
شبھانشو شکلا کی والدہ آشا شکلا نے بھی سماج وادی پارٹی کے صدر اکھلیش یادو اور ان کی اہلیہ ڈمپل یادو سے ملاقات کے بعد نیوز ایجنسی ’آئی این ایس‘ سے بات کی۔ آشا شکلا نے کہا کہ ’’جب وہ آئے تو بہت اچھا لگا، انہوں نے اپنی نیک تمنائیں اور ڈھیر ساری دعائیں دیں۔ ہمیں بہت خوشی ہوئی‘‘
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
