’حکومت پنشن کے ٹینشن میں ہماری نقل کر رہی‘، تیجسوی یادو نے عوام کے نام لکھا کھلا خط

بہار اسمبلی میں اپوزیشن لیڈر اور آر جے ڈی کے رہنما تیجسوی یادو نے بہار کی عوام کے نام ایک کھلا خط لکھا ہے۔ سوشل میڈیا پلیٹ فارم ’ایکس‘ پر پوسٹ کیے گئے اس خط میں انہوں نے لکھا کہ میرے پیارے بہار واسیوں، ہم تمام نے ساتھ مل کر بہار کو بدلنے کا جو عزم کیا تھا اس کے نتائج اب تھوڑے بہت سامنے آنے لگے ہیں۔ تقریباً 20 سال تک ’ناممکن‘ لفظ استعمال کر اور 20 سال پہلے کی حکومت کو ہر چیز کے لیے قصوروار ٹھہرا کر اور عوام کو گمراہ کر کے حکومت چلاتے رہے۔ ہم نے 2020 اسمبلی انتخاب میں ایک نئے بہار کا بلیو پرنٹ تیار کیا، بہار کو نمبر 1 ریاست بنانے کا مقصد رکھا اور ملک میں سب سے زیادہ نوجوان آبادی والے بہار کے نوجوانوں کو ایک ساتھ 10 لاکھ نوکریاں دینے کا عزم کیا۔ اس وقت یہی این ڈی اے حکومت ہمارے اعلانات، ارادے اور وعدوں کا مذاق اڑاتی تھی اور ہم سے پوچھا جاتا تھا کہ کہاں ہیں 10 لاکھ نوکریاں؟ کہاں سے دیں گے نوکری؟ پیسہ کہاں سے آئے گا؟

خط میں تیجسوی یادو یہ بھی لکھتے ہیں کہ ہم نے اپنی 17 ماہ کی مختصر مدت کار میں بغیر پیپر لیک اور تاخیر کے 5 لاکھ نوکریاں دے کر اور 3.5 لاکھ نوکریوں کے مواقع پیدا کر کے اپنی مضبوط قوت ارادی کو دکھایا ہے۔ ساتھ ہی انہوں نے لکھا کہ ہم بغیر پریشان ہوئے محروموں، دلتوں اور غریبوں کو حق دلانے کے لیے لڑتے رہے۔ ہم نے کھل کر کہا کہ ذات پر مبنی مردم شماری وقت کی ضرورت ہے، یہ ہونا چاہیے اور بہار والے متحد ہوکر اسے کرا کر ہی رہیں گے۔ 65 فیصد ریزرویشن کے لیے بھلے ہی آئین مخالف آر ایس ایس نے راہ میں رکاوٹ ڈالنے کی کوشش کی لیکن ہم آپ سے وعدہ کرتے ہیں کہ آپ کے تعاون اور آپ کے پیار سے جلد ہی وہ دن آئے گا جب بہار میں 65 فیصد سے زائد ریزرویشن نافذ کیا جائے گا۔

تیجسوی یادو نے خط میں لکھا کہ آئندہ اسمبلی انتخاب سے گھبرا کر اب نتیش حکومت ان کے منصوبوں کی نقل کر رہی ہے۔ ہم نے اعلان کیا تھا کہ حکومت بننے پر سماجی تحفظ پنشن کی رقم 400 سے بڑھا کر 1500 روپے فی ماہ کریں گے۔ نتیش حکومت نے اسے 400 سے اضافہ کر کے 1100 کر دیا۔ ساتھ ہی انہوں نے لکھا کہ ہماری حکومت آئے گی تو ’مائی بہن مان یوجنا‘ شروع کریں گے، غریب خواتین کو ہر ماہ 2500 روپے دیں گے۔ 94 لاکھ غریب کنبوں کو 2 لاکھ روپے کی معاشی مدد دی جائے گی۔ سماجی تحفظ پنشن کو 1500 روپے کیا جائے گا۔

تیجسوی یادو نے اپنے خط میں نتیش حکومت کو ہدف تنقید بناتے ہوئے لکھا کہ اب حکومت پنشن کے ٹینشن میں ان کی نقل کر رہی ہے اور عوام کی ہمدرد بننے کا دکھاوا کر رہی ہے۔ تیجسوی یہ بھی لکھتے ہیں کہ یہ تو ابھی شروعات ہے، بہار کو کیسے 5 سال کے اندر ملک میں نمبر 1 ریاست بنانا ہے، اس کا بلیو پرنٹ تیار ہے۔ انتخاب تک حکومت کو مجبور کر دیں گے کہ خواتین کو ہر ماہ 2500 روپے دینے والی ’مائی بہن مان یوجنا‘ جیسی کسی اسکیم کا اعلان کریں۔ گیس سلنڈر جو انہوں نے 1200 روپے سے بھی زیادہ کر دیا ہے، اس کی قیمت کم کرنے کا اعلان کریں، چیٹر-میٹر کے ذریعہ بجلی بل میں لوٹ کو ختم کر کے 200 یونٹ فری بجلی دیں، زمین سروے میں ہونے والی خامیوں کو روکیں، ڈومیسائل پالیسی نافذ کریں، تھانہ-بلاک میں رشوت خوری بند کریں، جرائم پر لگام لگانے اور بیٹیوں کو آگے بڑھانے کی بات کریں۔