جے این یو طلبہ یونین انتخابات میں 67 فیصد ووٹنگ، بائیں بازو اور اے بی وی پی کے درمیان مقابلہ، این ایس یو آئی نے لڑائی کو بنایا سہ رخی

نئی دہلی کی جواہر لال نہرو یونیورسٹی میں تعلیمی سال 2025-26 کے لیے طلبہ یونین انتخابات کے لیے ووٹنگ منگل کو پُرامن انداز میں مکمل ہو گئی۔ پورے دن کی گہما گہمی، نعروں، ڈھول کی تھاپ اور پوسٹروں کے درمیان طلبہ نے بڑھ چڑھ کر اپنے ووٹ ڈالے۔ اس بار کل 67 فیصد ووٹنگ ریکارڈ کی گئی، جو گزشتہ سال کے 70 فیصد کے مقابلے میں کچھ کم رہی، تاہم دلچسپی میں کوئی کمی نہیں دیکھی گئی۔

انتخابی عمل صبح 9 بجے شروع ہونا تھا مگر پولنگ ایجنٹوں کی تاخیر کی وجہ سے ووٹنگ تقریباً 10 بجے شروع ہوئی۔ دوپہر 1 بجے تک پہلا سیشن چلا، اس کے بعد 2:30 سے شام 5:30 بجے تک دوسرا مرحلہ جاری رہا۔ ووٹوں کی گنتی رات 9 بجے سے شروع ہوگی اور 6 نومبر کو نتائج کا اعلان کیا جائے گا۔