جی ایس ٹی کے فائدے گنائے جا رہے لیکن بازار ویران، بھوپیش بگھیل کا بی جے پی پر نشانہ

وزیر داخلہ امت شاہ کے حالیہ بیان پر بھی بگھیل نے طنز کیا۔ امت شاہ نے کہا تھا کہ اگر نکسلی ہتھیار ڈالیں گے تو ان کا ’ریڈ کارپٹ‘ بچھا کر استقبال کیا جائے گا۔ بگھیل نے سوال اٹھایا کہ اب تک کتنے نکسلیوں کے لیے ریڈ کارپٹ بچھایا گیا؟ حقیقت یہ ہے کہ زمینی سطح پر کچھ بھی نہیں ہوا اور صرف بیانات دیے جا رہے ہیں۔

وزیر اعظم نریندر مودی کے اس بیان پر بھی بگھیل نے سخت ردعمل ظاہر کیا جس میں مودی نے کہا تھا کہ بی جے پی-این ڈی اے حکومتوں نے ملک کو نئے طرز کا گڈ گورننس ماڈل دیا ہے۔ بگھیل نے کہا کہ ووٹ چُرا کر بنی حکومت میں اخلاقی جرات کا فقدان ہے۔ ان کے مطابق جنگلات کو بے دریغ کاٹا جا رہا ہے، کسان یوریا کی شدید قلت سے دوچار ہیں، لیکن حکومت کو ان مسائل کی کوئی پرواہ نہیں ہے۔