نئی دہلی: اروند کیجریوال کے 11 سالہ دور اقتدار میں دہلی کے جھگی والوں کی بدحالی کو نظر انداز کرنے پر دہلی کانگریس صدر دیویندر یادو نے جم کر حملہ بولا ہے۔ انہوں نے کہا کہ جب کیجریوال کی بدعنوان حکومت سے تنگ آ کر لوگوں نے اسے اقتدار سے بے دخل کر دیا تو وہ دہلی کو 4 ماہ تک بے سہارا چھوڑ کر پنجاب چلے گئے۔ جب بی جے پی حکومت نے جھگیوں کو منہدم کرنا شروع کیا تو کیجریوال کو اچانک جھگی والوں کی یاد آ گئی اور ان کے تئیں ہمدردی کا اظہار کر کے پھر سے دھوکہ دینے والی سیاست شروع کر دی۔
دیویندر یادو نے کہا کہ جب ریکھا گپتا حکومت نے بی جے پی کی بی ٹیم عام آدمی پارٹی کے ساتھ مل کر کچی آبادیوں پر بلڈوزر چلا کر اجاڑنا شروع کیا تب کیجریوال نے قصداً خاموشی اختیار کر رکھی تھی۔ حد تو یہ ہے کہ میڈیا کے سامنے بڑے بڑے دعوے کرنے والے کیجریوال دہلی کانگریس کے ذریعہ پوچھے گئے 10 سوالوں کا جواب دینے سے بھاگ رہے ہیں۔ ریاستی دفتر راجیو بھون میں نامہ نگاروں کو خطاب کرتے ہوئے دیویندر یادو نے کہا کہ ’’اروند کیجریوال نے نہ تو 2015 میں راجیو رتن آواس یوجنا کے تحت تعمیر کردہ 45000 فلیٹس کی الاٹمنٹ کی پرواہ کی جو جھگی والوں کی بحالی کے لیے بنائے گئے تھے، اور نہ ہی ان کی حکومت نے غریبوں کے لیے ایک بھی فلیٹ تعمیر کرایا۔‘‘
کانگریس ریاستی صدر نے کہا کہ جب ریلوے لائن کے قریب تعمیر کردہ جھگی-جھونپڑیوں کو اجاڑنے کی کوشش کی گئی تب کانگریس پارٹی نے عدالت میں جا کر ایک اسٹے آرڈر لیا۔ ساتھ ہی انہوں نے کہا کہ 2015 سے 2025 کے درمیان کچی بستیوں کی تعداد کئی گنا بڑھ گئی۔ اگر عام آدمی پارٹی اور بی جے پی حکومت نے کانگریس حکومت کے ذریعہ کالکاجی اور جیلر والا باغ میں شروع کی گئی ’جہاں جھگی وہیں مکان‘ کی اسکیم کے تحت تعمیر کا کام حساسیت سے شروع کیا ہوتا تو غریبوں کے آشیانے اس طرح سے نہیں اجاڑے جاتے اور نہ ہی ان کے مکین سڑکوں پر آتے۔ دیویندر یادو نے کہا کہ کیجریوال حکومت جھگیوں کی بربادی کو روکنے کے لیے آرڈیننس بھی لا سکتی تھی۔ لیکن کیجریوال ہمیشہ لوگوں کی آنکھوں میں دھول جھونکتے رہے اور ووٹ بینک کی سیاست کے تحت استعمال کرنے کے لیے انہیں بھٹکاتے رہے۔ کیجریوال نے جھگی-جھونپڑی والوں کے ساتھ صرف کھوکھلے وعدے کیے۔
دیویندر یادو نے کہا کہ بی جے پی لیڈران نے بھی اسمبلی انتخاب سے قبل جے جے کلسٹروں میں رہ کر بڑے بڑے وعدے کرنے کی پالیسی اپنائی۔ لیکن اقتدار میں بیٹھ کر بی جے پی نے بھی جھگی-جھونپڑی کلسٹروں پر بلڈوزر چلا کر اپنا اصلی غریب مخالف چہرہ دکھانا شروع کر دیا۔ بی جے پی اور عام آدمی پارٹی کے ذریعہ دہلی سے غریبوں کو باہر نکالنے کی یکساں پالیسی نے ان کے آپسی تعلقات کو ظاہر کر دیا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
