جھارکھنڈ کے ہزاری باغ میں جنگلی ہاتھیوں کا حملہ، ایک ہی خاندان کے 4 افراد سمیت 6 ہلاک

ہلاک ہونے والوں کی شناخت سورج بھوئیاں (55)، ان کی پوت بہو سمن دیوی (25)، سمن کے دو کمسن بچوں، منگرا بھوئیاں (58) اور دھنیشر رام (تقریباً 55) کے طور پر ہوئی ہے۔ بتایا گیا ہے کہ سورج بھوئیاں کا پورا خاندان ایک ہی گھر میں سو رہا تھا اور حملے کے دوران انہیں باہر نکلنے کا موقع نہیں مل سکا۔

واقعہ کے دوران گاؤں والوں نے ڈھول اور برتن بجا کر، ٹارچ کی روشنی ڈال کر اور شور مچا کر ہاتھیوں کو بھگانے کی کوشش کی لیکن جھنڈ کافی دیر تک گاؤں میں موجود رہا اور نقصان پہنچاتا رہا۔ کافی کوششوں کے بعد ہاتھی واپس جنگل کی سمت چلے گئے۔ اس کے بعد گاؤں میں چیخ و پکار اور غم کا ماحول چھا گیا۔