جموں و کشمیر کے رام بن میں بادل پھٹنے سے تباہی، 3 ہلاک، متعدد مکانات کو نقصان، ریسکیو جاری

مقامی انتظامیہ کے مطابق متاثرہ علاقے میں بڑے پیمانے پر نقصان ہوا ہے۔ کچھ مکانات مکمل طور پر منہدم ہو گئے، جب کہ کھیت اور باغات بھی متاثر ہوئے ہیں۔ واقعے کی اطلاع ملتے ہی مقامی پولیس اور ریاستی ڈیزاسٹر مینجمنٹ فورس کی ٹیمیں موقع پر پہنچ گئیں اور راحت و بچاؤ کا کام شروع کر دیا۔ ریسکیو ٹیمیں مسلسل سرچ آپریشن چلا رہی ہیں تاکہ لاپتہ افراد کو تلاش کیا جا سکے۔ انتظامیہ نے فوری طور پر متاثرہ خاندانوں کے لیے عارضی ریلیف کیمپ قائم کیے ہیں، جہاں کھانے پینے اور رہائش کا انتظام کیا گیا ہے۔

عہدیداروں نے بتایا کہ مسلسل بارش کے سبب ندی نالوں کا پانی خطرناک سطح پر پہنچ گیا ہے اور مزید بربادی کا خدشہ ہے۔ مقامی لوگوں سے اپیل کی گئی ہے کہ وہ چوکس رہیں اور نشیبی علاقوں سے محفوظ مقامات کی طرف منتقل ہو جائیں۔