جموں و کشمیر کو ریاست کا درجہ دینے کی درخواست پر سپریم کورٹ میں آج سماعت

اس مقدمے کی سماعت چیف جسٹس بی آر گوئی اور جسٹس کے ونود چندرن کی بنچ کرے گی۔ یاد رہے کہ سپریم کورٹ نے 11 دسمبر 2023 کو اپنے متفقہ فیصلے میں آئین کے آرٹیکل 370 کو منسوخ کرنے کے مرکز کے فیصلے کو برقرار رکھا تھا۔ اس فیصلے میں عدالت نے مرکز کو حکم دیا تھا کہ ستمبر 2024 تک جموں و کشمیر میں اسمبلی انتخابات کرائے جائیں اور ریاست کا درجہ جلد از جلد بحال کیا جائے۔

درخواست میں کہا گیا ہے کہ جموں و کشمیر میں ریاستی درجہ بحالی کے عمل کو طول دینا براہ راست جمہوری ڈھانچے پر اثر انداز ہو رہا ہے۔ اس سے عوام کے منتخب نمائندوں کی اہمیت کم ہو رہی ہے اور مرکز کے زیرِ انتظام حکومت کو غیر ضروری طور پر طویل مدت تک برقرار رکھا جا رہا ہے۔