جسپریت بمراہ کا شاندار پنجہ، جنوبی افریقہ پہلی اننگز میں 159 رنز پر ڈھیر

کولکاتا میں کھیلے جا رہے پہلے ٹیسٹ میں ہندوستانی رفتار کے جادوگر جسپریت بمراہ نے تباہ کن بولنگ سے میچ کا نقشہ بدل دیا۔ ان کی دھواں دار گیندبازی کے آگے جنوبی افریقی بیٹنگ لائن زیادہ دیر کھڑی نہ رہ سکی اور پوری ٹیم پہلی اننگز میں محض 159 رنز پر ڈھیر ہو گئی۔ ٹاس جیت کر پہلے بلے بازی کا فیصلہ کرنا جنوبی افریقہ کے لیے ناکام ثابت ہوا اور شروعات کے بعد جیسے ہی پہلا جھٹکا لگا، وکٹوں کا سلسلہ رکنے کا نام نہیں لے رہا تھا۔

جنوبی افریقہ نے اننگز کا آغاز پُراعتماد انداز میں کیا۔ اوپنرز ایڈن مارکرام اور رائن رکیلٹن نے ابتدائی 10.3 اووروں میں 57 رنز کی مضبوط شراکت قائم کی۔ دونوں بیٹرز نے انڈین تیز گیندبازوں کو ابتدا میں سنبھل کر کھیلتے ہوئے ایک اچھا پلیٹ فارم دیا لیکن یہ سلسلہ زیادہ دیر جاری نہیں رہ سکا۔ رکیلٹن 22 گیندوں پر 23 رنز بنانے کے بعد جسپریت بمراہ کی باہر جاتی ہوئی گیند پر کیچ آؤٹ ہوئے، اور اسی سے جنوبی افریقہ کی مشکلات کا آغاز ہوگیا۔