جاپان میں برڈ فلو کی تصدیق، ایک لاکھ نوے ہزار مرغیاں تلف کرنے کا فیصلہ

ٹوکیو: جاپان کی وزارتِ زراعت، جنگلات اور ماہی پروری نے ملک کے شمالی خطے ہوکائیڈو کے ایک پولٹری فارم میں برڈ فلو کے پھیلاؤ کی تصدیق کی ہے۔ حکام کے مطابق یہ اس خطے میں اس موسم کا چوتھا جبکہ پورے جاپان میں اکیسواں معاملہ ہے، جس کے بعد احتیاطی اقدامات مزید سخت کر دیے گئے ہیں۔

وزارت کی جانب سے جاری بیان میں بتایا گیا ہے کہ متاثرہ پولٹری فارم ہوکائیڈو کے شہر ابیرا میں واقع ہے جہاں تقریباً ایک لاکھ نوے ہزار مرغیاں پالی جا رہی تھیں۔ مقامی انتظامیہ کو فارم کی طرف سے بدھ کے روز اطلاع دی گئی تھی کہ مرغیوں میں غیر معمولی اموات اور بیماری کی علامات سامنے آ رہی ہیں۔