تمل ناڈو کے تروولّور ریلوے اسٹیشن پر اتوار کو بھیانک حادثہ پیش آیا۔ ڈیزل سے بھری ایک مال گاڑی میں اچانک آگ لگ گئی اور کچھ ہی دیر میں یہ آگ بوگیوں تک پھیل گئی جس میں اونچے اونچے شعلے اٹھنے لگے۔ اس واقعہ سے پورے اسٹیشن پر افرا تفری مچ گئی۔ مال گاڑی میں لگی آگ کا ویڈیو سوشل میڈیا پر بھی خوب وائرل ہو رہا ہے۔ آگ اتنی خوفناک لگی تھی کہ اس کے شعلے کے ساتھ پورے آسمان میں دھوئیں کا سیاہ غبار ہی دکھائی دے رہا تھا۔
ابتدائی اطلاع کے مطابق چنئی پورٹ سے ڈیزل لے کر نکلی ایک مال گاڑی تروولّور کے پاس آگ کی زد میں اس وقت آ گئی جب ٹرین کے چار ڈبے پٹری سے اتر گئے۔ اس کے بعد ڈبوں میں آگ تیزی سے بھڑکتی چلی گئی۔ واقعہ کے فوراً بعد فائر بریگیڈ اور راحتی ٹیم موقع پر پہنچ گئی اور آگ پر قابو پانے کی کوشش شروع کر دی۔
ریلوے افسر نے بتایا کہ ٹرین میں ڈیزل بھرا ہوا تھا اور آگ کی زد میں آئے چار ڈبوں کو الگ کرنے کے لیے باقی کے 48 ڈبوں کو ہٹانے کا کام تیزی سے کیا جا رہا ہے۔ اس حادثے کی وجہ سے چنئی-ارکنوم ریلوے سیکشن پر ٹرینوں کی آمد و رفت روک دی گئی ہے۔
مقامی انتظامیہ اور ریلوے افسروں نے لوگوں سے اپیل کی ہے کہ وہ جائے حادثہ کے پاس نہ جائیں، کیونکہ ٹرین میں انتہائی آتش گیر مادہ موجود ہے۔ افسروں نے بتایا کہ آگ لگنے کی وجہ سے ٹرین کا پٹری سے اترنا ہے۔ ابھی تک اس حادثے میں کسی جانی نقصان کی اطلاع نہیں ہے۔ ریلوے انتظامیہ حالات پر مسلسل نگرانی رکھے ہوئے ہے۔
ضلع مجسٹریٹ پرتاپ نے بتایا کہ آگ بجھانے کے لیے فائر اینڈ ریسکیو کی فوم سے مزین خصوصی گاڑیوں کا استعمال کیا جا رہا ہے۔ آس پاس کے رہائشی علاقوں سے لوگوں کو محفوظ نکال لیا گیا ہے اور ایل پی جی سلنڈروں کو بھی احتیاطاً ہٹا دیا گیا ہے۔ ریلوے پولیس آگ لگنے کی وجوہات کی شروعاتی جانچ میں لگ گئی ہے۔
