تعلیم کے لیے ’آن لائن موڈ‘ کو موزوں نہیں سمجھتے پونا کالج کے اسسٹنٹ پروفیسر ڈاکٹر ابرار احمد

’پونا کالج آف آرٹس، سائنس اینڈ کامرس‘ کا قیام 1970 میں ہوا اور ابتدائی دنوں سے ہی ’شعبۂ اردو‘ فعال ہے۔ شعبۂ اردو میں پی جی سطح تک اور فارسی و عربی میں یو جی سطح تک کی تعلیم دی جاتی ہے۔ دراصل اردو، فارسی و عربی تینوں زبانوں کا یہ مشترک شعبہ ہے جسے ’شعبۂ اردو، فارسی و عربی‘ کہتے ہیں۔ یہ شعبہ پونہ شہر کا واحد شعبہ ہے جہاں پر فارسی کو بطور مضمون پڑھایا جاتا ہے۔ اس شعبہ کو یہ اعزاز حاصل ہے کہ اس میں تدریسی عملہ ملک کی اعلیٰ ترین جامعات، مثلاً جامعہ ملیہ اسلامیہ اور جواہر لال نہرو یونیورسٹی سے وابستہ رہے ہیں۔

فی الوقت  بی اے اور ایم اے ملا کر شعبۂ اردو میں تقریباً 350 طلبا و طالبات تعلیم حاصل کر رہے ہیں۔ ان میں طالبات کی تعداد تقریباً 70 فیصد ہوگی، جس سے اندازہ ہوتا ہے کہ لڑکیاں تعلیم حاصل کرنے میں کافی آگے ہیں۔ جہاں تک اُردو کے تئیں ان کے رجحان کا سوال ہے، طلبا و طالبات سبھی سنجیدہ نظر آتے ہیں۔ اس کی وجہ یہ ہے کہ شعبہ انھیں کئی طرح کی سرگرمیوں میں مصروف رکھتا ہے۔ پونا کالج کا شعبۂ اردو قومی و صوبائی سطح پر سمینار، ورکشاپ، کانفرنس اور نصابی و غیر نصابی سرگرمیاں تواتر کے ساتھ منعقد کرتا رہتا ہے، جو طلبا و طالبات کو ذہین بناتا ہے اور ان کے اندر موجود خوبیوں کو نکھارتا ہے۔ بچوں کی تقریری، تحریری، تخلیقی و ادبی صلاحیتوں کو پروان چڑھانے کے لیے شعبۂ اردو میں ’انجمن بزم ادب‘ بھی ہے، جس کے تحت ہر ماہ ادبی تقاریب منعقد کیے جاتے ہیں۔ اردو کے طلبا و طالبات اکثر ہندوستان کی مختلف یونیورسٹیوں اور کالجز کے تقریری و تحریری مقابلوں میں حصہ لیتے ہیں اور انعامات و اعزازات سے سرفراز ہوتے ہیں۔ آپ کہہ سکتے ہیں کہ پونا کالج کا شعبۂ اردو بے حد فعال اور متحرک ہے۔

کورونا کے دوران اساتذہ اور طلبا دونوں ہی ایک ذہنی اور نفسیاتی کرب سے دو چار تھے۔ ایسے میں بچوں کو آن لائن تعلیم دینا اساتذہ کے لیے ایک چیلنچ تھا، لیکن انھوں نے مشکل حالات کو سمجھا اور طلبا کے مستقبل کو پیش نظر رکھتے ہوئے خود بھی محنت کی اور طلبا کا بھی حوصلہ ٹوٹنے نہیں دیا۔ ابتدا میں آن لائن کلاسز انتہائی صبر آزما تھے، کیونکہ کئی طرح کے مسائل کا سامنا کرنا پڑتا تھا۔ آن لائن تدریس میں ہمیں کئی بار ایسا تجربہ ہوا کہ ظاہری طور پر ہم بچوں کو پڑھا رہے تھے، لیکن حقیقی معنوں میں وہ موجود ہی نہیں تھے۔ یعنی طالب علم کا نام اسکرین پر نظر ضرور آتا تھا، لیکن جب ان سے کوئی سوال کیا جاتا تو اس کا فوراً کوئی جواب نہیں ملتا تھا۔ بچے اکثر کمزور نیٹورک کا حوالہ دے کر اپنے فون کو ’میوٹ‘ کر دیتے تھے۔ اس سے یہی نتیجہ نکلا کہ تعلیم کے لیے جس طرح کی یکسوئی چاہیے، وہ آن لائن  موڈ میں ممکن نہیں ہے۔ بالخصوص ان طلبا کے لیے، جو موبائل ہاتھ میں ہونے پر الگ الگ طرح کے پروگرام دیکھنے میں مشغول ہو جاتے ہیں۔ حالانکہ تعلیم کے تئیں سنجیدہ طلبا و طالبات نے اس مشکل دور میں بھی اپنا وقت ضائع نہیں کیا اور آن لائن کلاسز سے فائدہ اٹھایا۔

پونا کالج میں تکنیکی طور پر تو کسی طرح کا مسئلہ سامنے نہیں آیا، لیکن مجھے تعلیم کا روایتی طریقہ پسند نہیں۔ یہی وجہ ہے کہ میں اپنے طلبا کو کچھ الگ طرح سے تعلیم دینا پسند کرتا ہوں۔ دراصل ہندوستان کی بیشتر یونیورسٹیوں اور کالجز میں روایتی تدریس ہو رہی ہے، جہاں اساتذہ کلاس میں آتے ہیں، نصاب کی تکمیل کرتے ہیں، بچوں کو نوٹس تحریر کراتے ہیں، اور بس یہی ان کی ذمہ داری ہوتی ہے۔ اس طرح بچے امتحان میں اچھے نمبرات ضرور حاصل کر لیتے ہیں، لیکن ان کی صلاحیتوں میں کوئی خاص اضافہ نہیں ہوتا ہے۔ میں نے اس کے برعکس بچوں کی صلاحیتوں کو پروان چڑھانے کے لیے کلاس میں ہی کہانیوں کے تجزیے، کتابوں پر تبصرے اور ایک ہی موضوع پر متعدد مضامین کو پڑھ کر ایک نیا مضمون تحریر کرنے کی مشق کرائی۔ اس سے طلبا و طالبات کو خاطر خواہ فائدہ پہنچا۔ ان کے اندر ایک نئی سوچ اور فکر پیدا ہوئی، جس نے ان کی تحریری صلاحیتوں کو نکھارا۔

میری خوش نصیبی ہے کہ مجھے یونیورسٹیوں کے ایم اے اور بی اے سطح کی نصابی کتابوں کو تیار کرنے کا موقع میسر ہوا۔ یشونت راؤ چوہان اوپن یونیورسٹی، ناسک (مہاراشٹر) کے ایم اے اردو کی کتاب ’مہاراشٹر میں اردو نظم‘ میں نے تیار کی ہے، جسے طلبا و اساتذہ کے ساتھ ساتھ عام قاری نے بھی بہت پسند کیا۔ اسی طرح ’اندرا گاندھی نیشنل اوپن یونیورسٹی‘ (اگنو، نئی دہلی) کے ایم اے اردو کی 2 یونٹ بھی میری کاوشوں کا نتیجہ ہے۔ ایک ’قرۃ العین حیدر کا رپورتاژ ’دکن سا نہیں ٹھار سنسارمیں‘ کا خصوصی مطالعہ‘ اور دوسری شفیق فاطمہ شعریٰ کی نظموں کا تجزیہ۔ جہاں تک میری ادبی دلچسپیوں کا سوال ہے، افسانہ نگاری سے مجھے بے حد دلچسپی ہے۔ خاص طور سے میں بچوں کے لیے کہانیاں لکھتا رہتا ہوں جو مختلف رسائل و جرائد میں شائع ہوتے رہے ہیں۔ عنقریب میرا افسانوی مجموعہ منظر عام پر بھی آئے گا، ان شاء اللہ۔