بہار میں تبدیلی کی لہر، الیکشن کمیشن پر راہل گاندھی کے سوالوں کا کوئی جواب نہیں: سچن پائلٹ

میڈیا سے گفتگو کرتے ہوئے پائلٹ نے کہا کہ ’’بہار میں جو یہ یاترا نکلی ہے، عوام الیکشن کمیشن سے سوال کر رہی ہے کہ ووٹ چرا کر کس مقصد کی تکمیل کی جا رہی ہے۔ راہل گاندھی نے سی سی ٹی وی فوٹیج اور دیگر شواہد سامنے رکھے ہیں، اس کے باوجود کمیشن خاموش ہے۔‘‘ ان کا کہنا تھا کہ بہار کے عوام سمجھدار ہیں اور لاکھوں نام ووٹر لسٹ سے ہٹانے کی کوشش کے خلاف عوامی سیلاب سڑکوں پر امڈ آیا ہے، جس سے صاف ظاہر ہے کہ صوبے میں تبدیلی کی آہٹ سنائی دے رہی ہے۔

پائلٹ نے الیکشن کمیشن پر جانبداری کا الزام عائد کرتے ہوئے کہا کہ ’’جب ہم کمیشن سے سوال کرتے ہیں تو جواب بی جے پی دیتی ہے۔ اس کا مطلب یہ ہے کہ کمیشن کے رویے میں شکوک پیدا ہو رہے ہیں۔‘‘ انہوں نے کہا کہ بہار کے عوام اب فیصلہ کر چکے ہیں کہ وہ شفاف اور آزادانہ انتخابات چاہتے ہیں، اور اسی مقصد کے لیے یہ یاترا عوامی تحریک کی شکل اختیار کر چکی ہے۔