ایک کشتی پر دنیا کا چکر لگانے نکلے دو امریکی شہریوں کو اس وقت جان مشکل میں نظر آنے لگی، جب بحر ہند میں شدید طوفان کا سامنا کرنا پڑا۔ خوش قسمتی یہ رہی کہ امریکی شہریوں کے ذریعہ مدد کے لیے لگائی گئی پُکار انڈین کوسٹ گارڈ (ہندوستانی ساحلی محافظ) تک پہنچ گئی۔ حادثہ انڈمان نکوبار کے سب سے جنوبی کنارے اندرا پوائنٹ پر پیش آیا۔ دونوں امریکی شہریوں کو ان کی کشتی کے ساتھ ہندوستانی ساحلی محافظ حفاظت کے ساتھ کیمپبل بے لے آیا۔
موصولہ اطلاع کے مطابق جمعرات کو پورٹ بلیئر واقع ایم آر سی سی سنٹر کو ایک ڈسٹریس کال موصول ہوئی تھی۔ یہ کال امریکی سی-اینجل نامی کشتی سے کی گئی تھی جو اُس وقت اندرا پوائنٹ سے 53 ناٹیکل میل دور تھی۔ چنئی واقع یو ایس قونصلیٹ نے بھی انڈین کوسٹ گارڈ سے مدد کی اپیل کی۔ امریکی سی-فیئررس نے بتایا کہ خراب موسم کے سبب ان کی کشتی خراب ہو گئی ہے اور وہ سمندر میں پھنس گئے ہیں۔
بتایا جاتا ہے کہ الرٹ ملتے ہی جمعرات کی دوپہر 2 بجے انڈین کوسٹ گارڈ نے انٹرنیشنل سیفٹی نیٹ (آئی ایس این) فعال کر دیا۔ اس کے تحت اندرا پوائنٹ کے قریب سے گزر رہے سبھی جنگی جہاز اور مرچنٹ ویسیل کو ریسکیو کے لیے پیغام بھیج دیا۔ پیغام فلیش ہوتے ہی اندرا پوائنٹ کے قریب آپریشنل ڈیوٹی پر تعینات کوسٹ گارڈ کا جہاز آئی سی جی راجویر فوراً مدد کے لیے نکل گیا اور شام تک کشتی کے قریب پہنچ گیا۔ پھر آئی سی جی راجویر نے کشتی سے رابطہ قائم کیا۔ بے حد تیز ہواؤں اور کشتی کی میکانیکل فیلیئر کے باوجود دونوں عملہ کے اراکین بالکل صحیح حالت میں تھے۔ رات میں ہی آئی سی جی راجویر کشتی کو انڈمان لے کر نکل گیا۔ پھر جمعہ، یعنی 11 جولائی کی صبح کوسٹ گارڈ کا جہاز کشتی کو کھینچ کر کیمپبل بے لے آیا۔ ریسکیو مشن پر بیان جاری کر کوسٹ گارڈ فورس نے کہا کہ انڈین کوسٹ گارڈم میریٹائم سیفٹی کے لیے پوری طرح پُرعزم ہے۔
