’اگر کشمیر جنت ہے اور بنگال کا موازنہ اس سے کیا جا رہا ہے تو یہ اچھی بات ہے‘، عمر عبد اللہ کا بی جے پر طنز

جموں و کشمیر کے وزیر اعلیٰ عمر عبد اللہ نے 10 جولائی کو کولکاتا میں مغربی بنگال کی وزیر اعلیٰ ممتا بنرجی سے ملاقات کی۔ اس ملاقات کے بعد دونوں وزرائے اعلیٰ نے نامہ نگاروں سے بات بھی کی۔ عمر عبد اللہ نے بی جے پی کے اس دعویٰ پر طنز کسا ہے جس میں مغربی بنگال کا موازنہ کشمیر سے کیا جا رہا ہے۔ انہوں نے کہا کہ بی جے پی کہتی ہے کہ 2018 سے 2024 تک کشمیر کو جنت بنا دیا گیا ہے۔ اگر کشمیر جنت ہے اور بنگال کا موازنہ اس سے کیا جا رہا ہے تو یہ اچھی بات ہے۔ لیکن اگر ان کہنا ہے کہ کشمیر جہنم بن گیا ہے تو بی جے پی کو کشمیریوں سے معافی مانگنی چاہیے۔ ساتھ ہی انہوں نے کہا کہ میں تو 10 ماہ پہلے ہی یہاں آیا ہوں، اس سے پہلے تو بی جے پی کی ہی حکومت تھی کشمیر میں۔

مغربی بنگال کی وزیر اعلیٰ نے نامہ نگاروں سے بات کرتے ہوئے کہا کہ پہلگام حملہ کے بعد ان کی حکومت نے پونچھ اور راجوری میں متاثر کنبوں کی مدد کے لیے ایک ٹیم بھیجی تھی۔ عمر عبد اللہ نے اس کے لیے ممتا بنرجی کا شکریہ ادا کیا اور انہیں جموں و کشمیر آنے کا حکم دیا۔ ممتا بنرجی نے دعوت قبول کرتے ہوئے کہا کہ ’’درگا پوجا کے بعد میں کشمیر جانے کی کوشش کروں گی۔ بنگال کے لوگ کشمیر گھومنے جائیں، ڈرنے کی کوئی بات نہیں۔‘‘ ساتھ ہی انہوں نے مرکزی حکومت سے کشمیر میں سرحد کی سیکورٹی اور سیاحت کو فروغ دینے کی جانب اقدام کرنے کا مطالبہ کیا ہے۔

ممتا بنرجی نے کشمیر کی تعریف کرتے ہوئے کہا کہ وہاں کے مسالے، ڈرائی فروٹس، موسیقی، رقص اور فن حیرت انگیز ہیں۔ انہوں نے بنگال اور کشمیر کے درمیان سیاحت اور ثقافتی تبادلے کے لیے ’میمورینڈم آف انڈرٹیکنگ‘ کے بارے میں بھی بات کی ہے۔ ممتا بنرجی نے ٹالی ووڈ کو کشمیر میں فلم شوٹنگ کے لیے جانے اور کشمیری فنکاروں کو بنگال میں درگا پوجا اور یوم جمہوریہ کی تقریبات میں مدعو کرنے کی بات بھی کہی ہے۔ عمر عبد اللہ نے کہا کہ بنگال کے سیاحوں کی سیکورٹی کی ذمہ داری ہماری ہے۔ ہم تجارت، سیاحت اور رشتوں کو مضبوط کرنے کے لیے مل کر ساتھ کام کریں گے۔

مغربی بنگال کی وزیر اعلیٰ نے پہلگام دہشت گردانہ حملہ کی مذمت کرتے ہوئے کہا کہ مرکزی حکومت حملہ آوروں کو پکڑنے میں اب تک ناکام رہی ہے۔ ساتھ ہی انہوں نے کہا کہ سرحد کی حفاظت کی ذمہ داری مرکزی حکومت کی ہے۔ اگر ضروری ہو تو مرکز کو چاہیے کہ عمر عبد اللہ سے بات کر کے وہاں حفاظتی انتظام کو مزید مضبوط کریں۔