’اگر توانائی بحران اسی طرح بڑھتا رہا، تو کوئی بھی ملک اس کے اثرات سے محفوظ نہیں رہ سکے گا‘ آئی ای اے سربراہ کا انتباہ

ایران اور امریکہ-اسرائیل کے درمیان تقریباً 3 ہفتے سے جنگ جاری ہے، جس کے ختم ہونے کے کوئی آثار نظر نہیں آ رہے ہیں۔ اسی درمیان دنیا کی سب سے اہم آبی گزرگاہ ’آبنائے ہرمز‘ مؤثر طریقے سے بند ہے، جس کی وجہ سے ہندوستان سمیت پوری دنیا میں ایندھن کی فراہمی سے متعلق تشویش بڑھ گئی ہے۔ بین الاقوامی توانائی ایجنسی (آئی ای اے) نے بھی اس بحران کے حوالے سے انتباہ جاری کیا ہے۔

آئی ای اے کے سربراہ فاتح بیرول نے پیر (23 مارچ) کو کہا کہ اس جنگ سے پیدا ہوئے توانائی کے بحران کے باعث عالمی معیشت کو شدید خطرات لاحق ہیں اور کوئی بھی ملک اس کے اثرات سے محفوظ نہیں رہے گا۔ انہوں نے آسٹریلیا کی راجدھانی میں نیشنل پریس کلب سے خطاب کرتے ہوئے کہا کہ ’’موجودہ حالات ماضی میں 2 بار آنے والے تیل کے بحرانوں کی ملی جلی شکل اختیار کر چکے ہیں۔ آج عالمی معیشت بہت بڑے خطرے سامنا کر رہی ہے۔ مجھے امید ہے کہ اس مسئلہ کا حل جلد نکل آئے گا۔ اگر یہ بحران اسی سمت میں بڑھتا رہا تو کوئی بھی ملک اس کے اثر سے بچ نہیں پائے گا۔ اس لیے اب عالمی سطح پر فوری کوششوں کی ضرورت ہے۔‘‘

واضح رہے کہ آئی ای اے نے پہلے بھی تیل بحران سے متعلق وارننگ دی تھی۔ گزشتہ جمعہ کو ایجنسی نے کچھ مفید مشورے دیے تھے، جن سے حکومتیں، کمپنیاں اور عام لوگ اس بحران کے اثر کو کم کر سکتے ہیں۔ 11 مارچ کو آئی ای اے کے رکن ممالک نے ایمرجنسی ذخائر سے 40 کروڑ بیرل تیل جاری کرنے پر متفق ہوئے تھے، جو ایجنسی کی تاریخ میں اسٹاک سے نکالی گئی اب تک کی سب سے بڑی مقدار ہے۔

قابل ذکر ہے کہ اس جنگ نے عالمی تیل کی منڈی میں سپلائی کا سب سے بڑا تعطل پیدا کر دیا ہے۔ آبنائے ہرمز سے جہازوں کی نقل و حمل بند ہو گئی ہے، جس سے روزانہ تقریباً 2 کروڑ بیرل خام تیل اور پیٹرولیم مصنوعات متاثر ہو رہی ہیں۔ آمد و رفت بند ہونے سے پیٹرولیم مارکیٹ پر دباؤ بڑھ گیا ہے اور خام تیل کی قیمتیں 100 ڈالر فی بیرل سے تجاوز کر گئی ہیں۔ اس کے علاوہ ڈیزل، جیٹ ایندھن اور ایل پی جی جیسی ریفائنڈ مصنوعات کی قیمتوں میں بھی بھاری اضافہ ہوا ہے۔

دوسری جانب امریکی صدر ڈونالڈ ٹرمپ نے ایران کو متنبہ کیا ہے کہ اگر اگلے 48 گھنٹوں میں ’آبنائے ہرمز‘ کو مکمل طور پر نہ کھولا گیا، تو امریکہ ایرانی بجلی گھروں کو مکمل طور پر تباہ کر دے گا۔ ساتھ ہی انہوں نے کہا کہ حملے کا آغاز ایران کے سب سے بڑے پاور پلانٹ سے کیا جائے گا۔ اس کے فوراً بعد ایران کے پاسداران انقلاب (آئی آر جی سی) نے کہا کہ اگر امریکہ نے اس کے توانائی کے مراکز پر حملہ کیا، تو وہ نہ صرف آبنائے ہرمز کو مستقل طور پر بند کر دے گا بلکہ ان تمام ممالک کے توانائی کے مراکز کو بھی نشانہ بنائے گا جہاں امریکی فوجی اڈے موجود ہیں۔