اعظم خان کو الٰہ آباد ہائی کورٹ سے ملی راحت، ’کوالیٹی بار‘ پر قبضہ معاملے میں ضمانت کی عرضی منظور

قید و بند کی صعوبت برداشت کر رہے سماجوادی پارٹی کے سینئر لیڈر اور سابق وزیر اعظم خان کو آج ایک خوشخبری ملی ہے۔ 18 ستمبر کو الٰہ آباد ہائی کورٹ نے انھیں بڑی راحت دیتے ہوئے ایک معاملہ میں ضمانت کی عرضی منظور کر لی۔ معاملہ رامپور کے مشہور ’کوالیٹی بار‘ پر قبضہ سے جڑا ہوا ہے۔

میڈیا رپورٹس کے مطابق جسٹس سمیر جین کی سنگل بنچ نے اعظم خان کی ضمانت عرضی پر فیصلہ سناتے ہوئے اسے منظور کرنے کی اطلاع دی۔ الٰہ آباد ہائی کورٹ نے دونوں فریقین کی بحث مکمل ہونے کے بعد گزشتہ 21 اگست کو فیصلہ محفوظ رکھ لیا تھا۔ آج یہ فیصلہ سنایا گیا جو اعظم خان کے لیے باعث سکون ہے۔ حالانکہ ان کے خلاف کچھ دیگر معاملے بھی عدالت میں زیر سماعت ہیں، اور کچھ معاملوں میں وہ سزا بھی کاٹ رہے ہیں۔

اعظم خان گزشتہ 2 سالوں سے زائد عرصہ سے سیتاپور جیل میں بند ہیں۔ رامپور اور مراد آباد میں چل رہے کچھ مقدمات اور 2 معاملوں میں ہوئی سزا کے سبب انھیں جیل میں رہنا پڑ رہا ہے۔ ان معاملوں کی سماعت الگ الگ عدالتوں میں جاری ہے۔ رامپور کے ’کوالیٹی بار‘ کی زمین پر ناجائز قبضہ معاملہ میں ان کی ضمانت عرضی کو آج منظوری ملی ہے۔ یہ معاملہ 2019 میں درج ہوا تھا اور اعظم خان کو 2024 میں ملزم بنایا گیا تھا۔ اس وقت اعظم خان سابقہ حکومت میں وزیر برائے شہری ترقی تھے۔ ان پر الزام ہے کہ انھوں نے اپنے عہدہ اور اثرات کا غلط استعمال کر جرم کیا ہے۔