آسام میں سب سے بدعنوان حکومت کو ہٹانے کا وقت آ گیا: ملکارجن کھڑگے

کھڑگے نے دعویٰ کیا کہ آسام میں موجودہ حکومت نہ صرف بدعنوان ہے بلکہ اس میں تکبر بھی نمایاں ہے۔ انہوں نے کہا کہ پورے ملک میں شاید ہی کوئی ایسا وزیر اعلیٰ ہو جس پر اس قدر بدعنوانی اور غرور کے الزامات ہوں۔ ان کے مطابق ریاست کے وسائل کا غلط استعمال کیا جا رہا ہے اور زمینیں، کاروبار اور دیگر اثاثے مخصوص لوگوں میں تقسیم کیے گئے ہیں۔ انہوں نے کہا کہ کئی وزراء اور حکومتی افراد مختصر مدت میں کروڑوں روپے کے مالک بن گئے ہیں۔

انہوں نے عوامی جذبات کا حوالہ دیتے ہوئے کہا کہ آسام کے لوگ اپنی تہذیب اور روایات سے محبت کرتے ہیں اور وہ ایک ایسے وزیر اعلیٰ کو قبول نہیں کر سکتے جو ان اقدار کا احترام نہ کرتا ہو۔ کھڑگے نے کہا کہ موجودہ حکومت عوامی ترقی کے بجائے ذاتی مفادات پر زیادہ توجہ دے رہی ہے۔