آئینی ستونوں کی حفاظت میں وکلا کا کردار اہم: اجے ماکن

نئی دہلی: آل انڈیا کانگریس کمیٹی کے قومی خزانچی اجے ماکن نے کانگریس کی سالانہ قانونی کانکلیو 2025 سے خطاب کرتے ہوئے کہا کہ کانگریس کی آئینی اقدار آج شدید خطرے میں ہیں اور اس نظریاتی جنگ میں وکلا کو سب سے آگے آنا ہوگا۔ ہفتہ کے روز منعقدہ کانکلیو سے خطاب کرتے ہوئے نے کہا کہ کانگریس کی بنیاد پانچ بنیادی اصولوں پر ہے۔

اجے ماکن نے کہا کہ کانگریس کے پانچ بنیادی اصول ہیں آئین کی بالادستی، سماجی انصاف، شمولیتی ترقی، تمام مذاہب کے درمیان ہم آہنگی اور وفاقی ڈھانچے کا تحفظ۔ ماکن نے وضاحت کی کہ ان میں آئینی بالادستی وہ ’چھتری‘ ہے جو باقی تمام اقدار کو تحفظ فراہم کرتی ہے۔ انہوں نے کہا کہ کانگریس کا نظریہ صرف سیاسی نعرہ نہیں، بلکہ ایک سماجی عہد ہے جس کی جڑیں آئین میں پیوستہ ہیں۔